Zakład za přichod kładli

Donnerstag, 26. September 2019
Artikel bewerten
(0 Stimmen)

Rózborske lětanišćo jako efektiwne stejnišćo wužiwać

Zhorjelc/Rózbork (AK/SN). Lětanišći w Zhorjelcu a Rózborku měłoj dołhodobnje efektiwnje wužiwanej być. Tole podšmórny jednaćel zaměroweho zwjazka lětanišćoweho zarjadnistwa Rózbork/Zhorjelc Thomas Rublack. Nadawk zarjadnistwa je ležownosće wobhospodarjeć, regionalnje zwičnjeć a infrastrukturu dale wuwiwać. „Tuchwilu je w Rózborku čara za přizemjenje něhdźe 2 000 metrow dołha a 30 metrow šěroka. Bjez wulkich ćežow móhli ju na 2 500 metrow dołhosće a 45 metrow šěrokosće roz­šěrić. Potom móhli tu lětadła Boeing a Airbus přizemjeć“, jednaćel nowinarjam njedawno rozłoži. W Zhorjelcu maja něhdźe 700 metrow dołhu čaru k dispozi­ciji, hdźež pak njejsu po słowach Thomasa Rublacka žane wulke změny móžne. Lětanišćo słuži přede­wšěm sportowemu wobłukej.

Cyłkownje maja při Rózborskim lětanišću 34 hektarow přemysłoweje pře­strjenje, hdźež móža so předewzaća zaměstnić. Tuchwilu stej tam tankownja a solarna připrawa instalowanej.

27. awgusta staj Thomas Rublack a jednaćel Drježdźanskich Połobskich lětadłowych zawodow dr. Andreas Sperl kooperaciske zrěčenje podpisałoj. Na terminje přitomnaj běštaj tež sakski ministerski prezident Michael Kretschmer (CDU) a Zhorjelski krajny rada Bernd Lange (CDU). Zaměr zrěčenja je, so sylnišo temje recycling wěnować. Hižo w lětomaj 2016 a 2017 je zaměrowy zwjazk studiju praktikabelnosće zhotowić dał. Drježdźanske předewzaće wužiwa Rózborske lětanišćo jako pilotowy projekt. „Zhromadnje z Kamjeničanskej Techniskej uniwersitu rozmyslujemy wo dołhodobnym znowawužiwanju lětadłow“, Thomas Rublack wuswětli. Stejnišćo w Rózborku chcedźa na centrum za znowawužiwanje lětadłowych dźělow wuwić. Te chcedźa jako surowizny znowa do hospodarskeho kołoběha zapřijeć. Hižo nětko, tak jednaćel lětanišća zwurazni, 65 procentow maćiznow znowa wužiwaja. „Chcemy ekobilancu lětanišća jasnje polěpšić“, Bernd Lange wuzběhny. „To je dołhodobnje tež nuznje trěbne. Wšako njebudźe po fachowych analyzach hač do lěta 2026 wulka ličba lětadłow hižo wužiwana. A to je šansa za přichod Rózborskeho lětanišća.“

Tež za hornjołužiske wojerske zwučowanišćo móhło lětanišćo w Rózborku přichodnje nastupajo transport a logistiku wažnu rólu hrać.

Veröffentlicht in Hospodarstwo
Bitte anmelden, um einen Kommentar zu posten

Anzeige