Wudźěłki bóle hódnoćić

Donnerstag, 10. Oktober 2019
Artikel bewerten
(0 Stimmen)

Łužiscy rybarjo lětsa znowa mnohe ćeže přetrać dyrbjeli

Budyšin/Hóznica/Rakecy (SN/BŠe). Łužiscy rybarjo so tež lětsa z wulkimi će­žemi bědźa. Tak mějachu kaž hižo loni přemało wody w hatach. „Žně rybow su w jednotliwych wodźiznach chětro rozdźělne. Tam, hdźež bě dosć wody, smy z wunoškom přewšo spokojom“, hatar Armin Kittner z Hóznicy (Petershain) rozkładuje. Wón plahuje ryby najwšelakorišich družin, kaž šćuki, karpy a pstruhi. W někotrych z wobhospodarjenych hatow pak mějachu tež lětsa zaso přemało wody. „Ryby nimaja dosć bio­logiskeje maćizny, zo móhli wotpowědnje rosć“, Kittner wuswětla. Mało wody pak so hišće dale wuskutkuje, a to na pře­mało kislika. Nimo toho móža škód­niki-kormo­rany w niłkej wodźe lóšo za ry­bami łapać. Fachowcy samo z toho wucha­dźeja, zo je 50 procentow karpow jednoho lětnika wopor tohole ptaka.

Z wulkimi škodami kormorana dla liča­ tež w Lipičanskim hatarstwje, kotrež Karl-Heinz Herrmann wobhospodarja. Žně drje hišće zahajene njejsu, ale hižo nětko liči wón z wulkimi stratami škódnika dla. Dale pokazuje na to, zo měli ryba­rjow wjele sylnišo podpěrać, wšako njewobhospodarjeja woni jenož haty, ale hladaja předewšěm biotopy a zaručeja tak najwšelakorišej zwěrinje žiwjenski rum. „Rybar je stajnje prezentny a ma cyłe­ lěto dźěło, rjane drje, ale tež spróc­niwe. Přiwšěm bych so kóždy čas zaso za po­wołanje rozsudźił. Wuměnjenja pak měli so nuznje polěpšić“, Herrmann wuzběhnje. Rybarjow njeje wjele, ale jich připóznaće a hódnoćenje měło přibě­rać. Wšako na polu přirodoškita tójšto zdokonjeja. Wotpowědne dźěło hladajo na produkciju regionalneho zežiwidła ma so poprawom w płaćiznje wotbły­šćować. Prašenje wostanje, hač bychu ju kupcy přiwzali.

We łužiskich hatach plahuja přede­wšěm karpy, kotrež maja tež mjeno „rybja­cy chlěb“. Po cyłej Sakskej su ry­barjo loni 1 717 tonow karpow nažnjeli, tři procenty wjace hač lěto do toho. Cyłkow­nje su 2 215 tonow ryby z hatow wułójili, z čimž produkowachu 12,2 procentaj podźě­la cyłeje Němskeje a ležachu tak na štwórtym městnje. Najwjac ryby, 29,3 procenty, nažnjachu loni w Bayerskej, w Badensko-Württembergskej 16,6 procentow a w Delnjej Sakskej 14,7 procentow.

Hladajo na suche lěta budźe rybarjow wodowy etat přichodnje dale a bóle zaběrać. Tak budu sej hłowu łamać dyrbjeć, zwotkel wodu brać. K zahajenju lětu­šich karpowych tydźenjow srjedź septembra wuradźowachu wo tym hižo w Picnju. A tam běchu sej přezjedni, zo měli wo strategijach w zwisku ze škitom přirody rozmyslować. Jónu maja hatarjo móžnosć, wodu składować. Tola kóždy nowozapołoženy hat je płonina, kotraž ma hladana być. Hatarjo njeplahuja jenož rybu, ale su nimo­ toho wodowi hospodarjo a managerojo kaž tež škitarjo a hladarjo přirody.

Veröffentlicht in Hospodarstwo
Bitte anmelden, um einen Kommentar zu posten

Anzeige