Turistikarjow wo knihujomnych poskitkach informowali
Budyšin (SN/BŠe). Ryzy serbske poskitki we Łužicy sej turisća stajnje zaso přeja, a to předewšěm knihujomne poskitki, za kotrymiž móža so wobhonić. Wčera su turistikarjo dohlad do „serbskeho Budyšina“ dóstali, a to na tak mjenowanym zeznawanskim tripje po sprjewinym měsće. Fachowy wuraz fam-trip wužiwaja turistikarjo za informaciske zarjadowanja, hdźež móžeš něšto wo měsće abo kónčinje zhonić. Towarstwo Serbski kulturny turizm je nětko na tajke přeprosyło a z čłonami a dalšimi zajimcami w detailu přihotowało. Wuslědk toho bě tura po měsće z najwšelakorišimi stacijemi. „Něhdźe 15 akterow z turistiskeho wobłuka – informacijow, busowych předewzaćow a měšćanskich wodźerjow – je přišło“, wjeseleše so předsyda towarstwa Pětr Brězan.