Miła zyma so na rostliny w přirodźe a zahrodnistwach wuskutkuje
Budyšin (SN/BŠe). Krutu zymu přez něšto tydźenjow tež lětsa we Łužicy žanu njemějachmy, a to stawa so z dale a chutnišim problemom. Časnik w přirodźe naraz spěšnišo tikota. Mnozy wobsedźerjo zahrodow zwěsćeja, zo so kerki, róže a zela samo hižo zelenić započinaja. „Budźe-li nětko trochu zymnišo, drje so róst štomow, kerkow a dalšich rostlin zaborzdźi. Jeli budźe hišće ćoplišo, so wšitko hišće spěšnišo wuwije. Potom pak móhli pózdnje zmjerzki wulku škodu načinić“, informuje wobswětoškitny zwjazk Nabu. Rostliny maja energijowe rezerwy, ale hač změja druhi sylny wubitk, njeje wěste. Nimo toho hrozy strach, zo to někotre družiny scyła njepřetraja.