Často dźensniši čas słyšimy, zo je dale a mjenje lěkarjow. Na internetnej stronje Zjednoćenstwa kasowych lěkarjow nańdu zajimcy kopicu wupisanjow. Stajnje so pacienća wjesela, hdyž su městna jich lěkarjow znowa wobsadźene.
Budyšin (SN/BŠe). Wobhladaš-li sej starobu mnohich lěkarjow, wosebje tež fachowych, spóznaješ, zo su wjacori hižo starši. Njezadźiwa tuž, zo so ludźo starosća, kak dołho drje praksa dale wobsteji. W padźe Budyskeje žónskeje lěkarki Galiny Vogt w tak mjenowanej poliklinice móža pacienća wodychnyć. Franciska Hejdušcyna z Róžanta je praksu spočatk lěta přewzała. Po dźěłowych stacijach w Drježdźanskej chorowni Nowe město, w Kamjenskej chorowni maltezow a w Drježdźanskej praksy žónskeho lěkarja je so 41lětna nětko rozsudźiła so zesamostatnić. Wosebje nazhonjenja w praksy su ju k tomu pohnuli. „Hladajo na samodruhe žony je chorownja často poslednja stacija, hdyž dźěćko porodźeja. Nětko móžu je wot spočatka do kónca přewodźeć“, mać třoch dźěći wuswětla.
