Zły Komorow (SN/BŠe). Kupa na Złokomorowskim jězorje je najprjedy raz saněrowana. Bagry a płuwace připrawy nětko zaso na kraj dowjezu, zdźěli Łužiska a srje­dźoněmska towaršnosć hórnistwoweho zarjadnistwa (LMBV). Wot nowembra su tam z pomocu płuwaceje techniki płoninu wokoło kupy wobdźěłali. „Na­jebać ćežke wobstejnosće je twarska firma ETK za wódnu techniku kupu saně­rowała“, wuzběhny nawoda saněrowanskeho wobłuka pola LMBV Gerd Richter. Dalše dźěła pak su trěbne a móhli hišće chwilu trać.

Nětko slěduje najprjedy raz dokumentacija wo zakónčenych naprawach. Dźěle wobłuka wokoło jězora, kotrež běchu hižo­ dlěje njepřistupne, budu bórze zaso wobchodźomne. Wčera je braniborski zarjad za geologiju a hórnistwo wo pře­strjenjach rozsudźił, kotrež měli dale za­wrjene wostać. Hižo dźensa chcyše LMBV areal z Kóšynskeho směra wotewrěć, hdźež móža so ludźo přichodnje zaso wočerstwić a wuchodźować.