Ratarjo so třeće lěto za sobu ze suchotu bědźa a proša wo pomoc

Budyšin (SN/BŠe). Sakscy ratarjo předsydku wuběrka za energiju, škit klimy a ratarstwo Ines Springer (CDU) w krajnym sejmje naležnje wo pomoc proša. Jich połoženje dźě je tuchwilu wjac hač špatne. Nimo koronakrizy bědźa so třeće lěto za sobu ze suchotu, kotraž hižo Saksku wosebje wohroža. To wuchadźa tež z monitoringa Srjedźoněmskeho klimoweho běrowa UfZ w Lipsku. Kaž tón wujewja, je swobodny stat najbóle potrjecheny po cyłym Zwjazku. Po informa­cijach němskeje wjedroweje słužby so wjedro tež přichodnje wulce njezměni. Mjeńše zliwki dawno njedosahaja njedostatk wurunać. Měrcowske a aprylske wusywy pak trjebaja nuznje wodu, zo móhli schadźeć; nazymske kultury runje tak. „Zo móhli dalšemu přiwótřenju połoženja zadźěwać, je nětko pomocny program za ratarske zawody jara trěbny“, pisa prezident sakskeho burskeho zwjazka Torsten Krawczyk. Potrjecheni su zwól­niwi so wosobinsce z Ines Springer zetkać a jej aktualne połoženje rozłožić.