Mały Wjelkow (UM/SN). Małowjelkowski prazwěrjenc je loni nimale 200 000 hosći wopytało. Nimo toho zličichu 25 000 přidatnych tiketow w susodnym błudnišću, kotrež parkej wot lěta 2020 administratiwnje přisłuša. Najebać to, zo smědźachu woblubowane zarjadnišćo koronapandemije dla hakle ze zapozdźenjom dweju měsacow wotewrěć, je wjele zajimcow do parka před Budyskimi wrotami přichadźało.
Hladajo na předchadźace lěta nochcedźa so zamołwići dokładnišo wuprajić. „Ze sezonu smy spokojom a wjeselimy so, zo je w lěćnych a nazymskich prózdninach telko ludźi prazwěrjenc wopytało“, informuje Linda Krause, asistentka Budyskeje wobdźělenskeje a wobhospodarjenskeje towaršnosće (BBB) za nowinarske a zjawnostne dźěło. Znate pak je, zo běchu w lěće 2019 z něhdźe 242 000 wopytowarjemi dotalny rekord docpěli.
