Rozsud w Sakskej hižo jasny – w Braniborskej hišće pilnje dźěłaja

Budyšin/Grodk (SN/BŠe). Krajne zahrodne přehladki su wuhotowarjam stajnje dobra šansa so prezentować a přestrjenje naslědnje wuwić. Wone přisporjeja wuwiće dobreho imaga a zesylnjeja měšćanske a krajinowe wuwiće. Tole je so hižo wuspěšnje w lěće 2012 w Lubiju pokazało. Minjenu wutoru je sakski kabinet namjetej wobswětoweho ministra swobodneho stata Wolframa Günthera (Zeleni) wotpowědował a městu Aue-Bad Schlema wuhotowanje přehladki w lěće 2026 dowěrił. Wone dźě bě naposledk ­hišće jenički požadar. Wo wuhotowanje 10. sakskeje zahrodoweje přehladki pak rozmyslowaštej spočatnje mjez druhim tež měsće Wojerecy a Kamjenc. K požadanju pak dóšło njeje. Přičina toho bě předewšěm financowanje swójskeho podźěla. Sakska podpěruje wuhotowarjow ze stajnje pjeć milionami eurow, štož za zwoprawdźenje zdźěla chětro naročnych projektow njedosaha. Byrnjež w městomaj hižo konkretne namjety a koncepty předleželi, rozsudźichu so zamołwići přećiwo tomu, požadanje wotedać.