Afriskej swinjacej mrětwje wěnuja zamołwići aktualnych podawkow w Ukrainje a w času koronapandemije jenož mało kedźbnosće. Wuskutki w ratarskich zawodach tež Hornjeje Łužicy su přiwšěm katastrofalne.
Budyšin (SN/BŠe). Ratarjo w Sakskej plahuja dale a mjenje swini. Kaž ze zdźělenki Kamjenskeho statistiskeho zarjada wuchadźa, je jich ličba w běhu jednoho lěta wo 7,8 procentow woteběrała, štož je něhdźe 51 000 skoćatow mjenje. Přičina toho su předewšěm afriska swinjaca mrětwa a mjenje naprašowanjow za swinjacym mjasom po cyłej Europje.
Minjeny tydźeń bu wozjewjene, zo budźe w Hornjej Łužicy Klukšanski zawod přichodnje zawrjeny. Kaž jednaćel Swen Jatzke zdźěli, budźe to snano hižo w aprylu. Wot dotal cyłkownje 20 000 městnow za swinje je tam jenož hišće nimale 3 000 wobsadźenych. Kóšty za plahowanje swini su prosće přewysoke a płaćizny za mjaso přeniske. Tuž so hižo njewudani swinje plahować. Dale njeje na wuchodźe Sakskeje žanych móžnosćow plahowany skót zarězać. Sobudźěłaćerjo zawoda pak maja so nětko za nowym dźěłom rozhladować.
