Fachowy wobłuk wjelk rozestaja so intensiwnje z twochnjenjom stadła

Zhorjelc (SN/JBo). Ćeknjene stadła wowcow a dalšeho skotu, problem to, kotryž předewšěm tež łužiskich wowčerjow a plahowarjow pastwoweho skotu po­trjechi. Hakle minjeny tydźeń bě w nocy wot 6. na 7. julij z pastwy w Dubjanskim lěsu, kotryž wupřestrěwa so we wokrjesomaj Budyšin a Zhorjelc, stadło wjac hač sto wowcow a kozow twochnyło. „Plahowar skotu je nam wutoru třinaće mortwych, 36 zhubjenych a 53 znowa ­zapopadnjenych zwěrjatow přizjewił. Z 53 žiwych a zaso zapopadnjenych ­skoćatow je něhdźe dźesać zranjenych, z nich dwě ćežko, tak zo njemóžemy nuzowe morjenje skotu přichodne dny wuzamknyć“, zdźěli našemu wječornikej nowinska rěčnica krajneho Sakskeho zarjada za wobswět, ratarstwo a geologiju (LfULG) Karin Bernhardt.

Našli su na pastwje w Dubjanskim lěsu tohorunja zakusanu wowcu. Ta mě­ješe po informacijach LfULG slědy kusanjow, kajkež je wulke canidy zawinuja. Canidy je pomjenowanje zwěrjatow, kiž přisłušeja swójbje psow a k nim słušeja tež wjelki.