Ratarjo wokoło Koćiny starosća so lětušich žnjow dla

Koćina (SiR/SN). Mróčele procha wobdawaja jěducu syčomłóćawu. W ćopłym lětnim powětře lětaja tysacy pluwow rožki. Napohlad na polo w Koćinje je mały dočasny zaćišć wo lětušej prognozy žnjow. „Klimowa kriza je w Sakskej přitomna. Suche pola, nuzowje domchowane žito, wusušene rěčki, škodowane lěsy: Wuskutki su wočiwidne. Ratarstwo to hižo někotre lěta bolostnje začuwa“, rozłoži sakski ratarski minister Wolfram Günther (Zeleni) na nowinarskej rozmołwje minjeny pjatk w Koćinskim Krabatowym mlokowym swěće. Nimo škita klimy a skła­dowanja wody je tohodla ćim wa­žniše, dochodowe perspektiwy w ratar­stwje polěpšić. Wolfram Gün­ther ma wutwar regionalnych wudźěłkow za dobry započatk. „Sadźamy bóle na wutworjenje hódnotow w regionje, wot pola hač na taler. Podpěramy to z tójšto instrumentami. Mjez druhim su to naprawy nastupajo přiměrjenje ratarstwa na sćěhi klimoweje krizy, wšako je tole za zawody woprawdźite wužadanje.