Koćinski „Krabatowy mlokowy swět“ je sej dobyće w sakskim krajnym wubědźowanju k zwěrjatam přiměrjenemu a za wobswět znjesliwemu plahowanju ratarskich skoćatow 2021/2022 zawěsćił.

Koćina (JK/SN). Zo su wuspěch a dobry wunošk w hródźach kaž tež spokojacy poskitk we wobchodach wotwisne wot mnohich faktorow we wobłuku ratarskeho dźěła, potwjerdźi jednaćel Kulowskeje MKH Tobias Kockert wčera při witanju na zarjadowanje składnostnje přepodaća myta. Při tym wupraji swoje spokojenje nad tym, zo pokaza přitomnosć mnohich medijowych zastupjerjow na wažnosć tohole podawka, ale tež na zajim za ratarstwo a jeho aktualne, nic přeco lochke stejišćo. Wuspěch Koćinskeho zawoda złožuje so na skrućeny cyłk kołoběha póda – rostlina – skoćo – póda a zapřija z tym mnohich, kotřiž ze swojim wšědnym dźěłom k wuspěšnej produkciji a nic naposled k dobyću tajkich mytow přinošuja.