Wobchadny zwjazk Hornje Łobjo (VVO) je dźensa wobšěrne naprašowanje mjez sobujěducymi zahajił. Předewšěm dźe zamołwitym wo to zwěsćić, kotre zwiski pasažěrojo najbóle wužiwaja.

Budyšin (SN/BŠe). Sobujěducy bliskowobchadnych srědkow kónčiny zwjazka VVO, k čemuž słušaja mjez druhim wokolina wokoło Kamjenca, Kulowa a Wojerec, budu klětu jara prašani. Dźensa je VVO wobšěrne naprašowanje zahajiło. „Na te wašnje tójšto wo zwiskach zhonimy, kotrež pasažěrojo busow abo tež ćahow wužiwaja“, wuzběhny nawoda financneho wotrjada VVO Peter Kreher. „Ličby a wotmołwy sobujěducych na naše prašenja su wosebje wažne, zo by kóžde wobchadne předewzaće po cyłym zwjazku sprawny podźěl za swoje dźěło a na z tym zwisowacym jězbnym pjenjezu dóstało.“