Mjeztym hižo 18. króć je so minjeny štwórtk w Choćebuzu Łužiska konferenca DGB wotměła, na kotrejž diskutowachu zastupjerjo dźěłarnistwow a politikarjo wo změnje brunicowych rewěrow, strukturnej změnje a přichodźe industrije w regionje.
Choćebuz (SN/BŠe). Tema zastaranje z energiju bě jedne z ćežišćow 18. łužiskeje konferency, kotruž stej Zwjazk dźěłarnistwow (DGB) Berlin-Braniborska a Sakskeje minjeny štwórtk w Choćebuzu wotměłoj. Ruski nadpad na Ukrainu je energijowu krizu zawinił, čehoždla su wobydlerjo we Łužicy njewěsći. Politiske diskusije, wudobywanje brunicy hižo do lěta 2030 zakónčić, ludźi chětro starosća. „Akceptanca za energijowu změnu we Łužicy so pozhubja“, rěka w poziciskej papjerje, kotruž bě zwjazk dźěłarnistwow na konferency wozjewił. Tak jewja so mjez wobydlerjemi prašenja kaž na přikład: Kak hodźi so zastaranje energije w předewzaćach a priwatnych domjacnosćach zawěsćić? Hdy skónči so čas wysokich płaćiznow? Kak dołho je brunica trěbna?
