Hač do zajutřišeje njedźele, 9. oktobra, je Sakska krajna zahrodkowa přehladka w Torgauwje hišće přistupna. Tuž skići kónc tydźenja poslednju składnosć ­za wopyt.

Štóž chwile ma, njech sej na wustajeńcu w měsće reformacije hišće dojědźe. Nazymske rostliny so w najrjeńšej pyše prezentuja. Tež wrjós wuhladaš tam we wšěch barbach. Poprawom je nětko najlěpši počas za wopyt, wšako njebě w lěću z temperaturami nad 35 stopnjemi celsiusa wuchodźowanje mjez dwórnišćom a po­brjohom Łobja wulke wjeselo a tuž wothłós wjele snadniši, hač běchu sej organizatorojo wočakowali. Tuž budź jim na poslednim kóncu tydźenja hišće raz sylny nawal publikuma popřaty. A druhim sakskim městam, kotrež tajki ewent dotal wuhotowali njejsu – k nim Budyšin bjezdwěla słuša –, njech je wopyt poručeny, zo bychu sej nastorki sobu wzali.