Na Mjezynarodnym zelenym tydźenju w Berlinje wočakuja 1 800 wustajerjow
Berlin (SN/MiP). Po dwěmaj lětomaj přestawki korony dla budźe Mjezynarodny zeleny tydźeń (IGW) w Berlinje lětsa zaso swojich wopytowarjow witać – a to wot 20. do 29. januara 2023. Wiki njejsu jenož w Němskej jedne z najznaćišich wičnych eventow – ze swojim trójnym wobłukom zežiwjenje, ratarstwo a zahrodnistwo su tež w mjezynarodnym měritku jónkrótne. Zarjadowarjo wočakuja něhdźe 1 800 wustajerjow z cyłeho swěta, kotřiž budu tu swoje mjezynarodne a regionalne speciality prezentować. Tež něhdźe 200 mjezynarodnych a narodnych zastupjerjow politiki je swoje wobdźělenje připowědźiło.
Móhłrjec ideelni nošerjo zarjadowanja stej Zwjazkowe zjednoćenstwo zežiwidłoweje industrije (BVE) a Němski burski zwjazk (DBV), kotrejuž programatiskej titulej zdobom tež tematiske wusměrjenje wikow postajitej. „Tak słodźi přichod“ je lětuši moto, pod kotrymž BVE publikumej swoju dźěławosć předstaji, mjeztym zo so DBV pod titulom „Moderne ratarstwo dožiwić“ publikumej prezentuje.
