Nětko je jednaćelstwo předewzaća MAJA­ meble w Kulowje wobkrućiło, zo dyrbi, chce-li zawodej přichod zawěsćić, njemału ličbu sobudźěłaćerkow a sobudźěłaćerjow pušćić.

Kulow (SN/at). Meblowa twornja MAJA w Kulowje tči w ćežach. To su dźěławi minjenu póndźelu na zawodnej zhromadźiznje zhonili a, zo ma so tam cyłkownje 198 dźěłowych městnow šmórnyć. Na naprašowanje našeho wječornika zdźěli firmowa rěčnica Alexandra Bufe, zo je předewzaće MAJA z přibližnje 750 dźěławymi, z wulkim dźělom z Pólskeje, w Kulowje wažny dźěłodawar. To chce jednaćelstwo tež w přichodźe zaručić. Ale cyłohospodarske połoženje, trajaca zdźeržliwosć kupcow a z tym zwjazany spad ličbow z nadawkow su přičiny, na kotrež jednaćelstwo nětko z přiměrjenjom produkciskich kapacitow reaguje. „Jako sćěh toho 155 dźěłowych městnow wotpadnje, w samsnym zwisku je za 43 dźěłowych městnow jeničce nachwilna potrjeba dźěła“, firmowa rěčnica wuwjedźe.