Niska (UM/SN). „Niska jedna“ – pod tutym hesłom steješe wčera 15. pominanska straža Nišćanskich wagonotwarcow. Wona pak njeje so před wrotami zawoda wotměła, ale zahaji so jako manifestacija na Naměsće młodźiny. Z toho sformowaše so protestny ćah z něhdźe 300 wobdźělnikami po hasach nutřkowneho města. Namołwu „Niska jedna“ móhli w dwójnym zmysle rozumić: Na jednej stronje jako znamjo, zo wagonotwarcy dale trajace mjelčenje jednaćelstwa Tatravagonka AG k přichodej twornje njeakceptuja a nětko sami jednaja. Na tamnej stronje su so wobchodnicy a wikowarjo k najwjetšemu zawodej města wuznawali. „Njeje žanoho wobchoda, kotryž žadyn poćah k wagonowni nima“, rjekny Nišćanski citymanager André Schulze. Wón je akciju koordinował. „Wšudźom su mi prajili: Mój nan je tam dźěłał, mój bratr tam dźěła. Kóždy ma w tajkim městačku něšto z najwjetšim zawodom činić.“ Wotpadnje-li wagonownja jako dźěłodawar, dyrbja z wotćehnjenjom mnohich potrjechenych swójbow ličić. To ma njepřewidźomne sćěhi za kupnu móc w měsće.