Drježdźany/Lubij (dpa/SN/MiP). Kawsa „krejlačneho“ Lubijskeho wjelka nima kónca. W lěće 2022 běše wony wjelk wjele měsacow po Lubijskich polach a honach po puću a je so dohromady sydom króć do Chrapowskeho hajnišća za dźiwinu zadobył. Dwě dwanatce dańkow (Dammwild) běše kónčna suma woporow tutych nadpadow. W januarje 2023 přizwoli Zhorjelski krajny rada Stephan Meyer (CDU) wottřělenje wjelka. Zamołwite sakske fachowe instancy wobkrućichu, zo wuměnjenja za to předleža a zo je hranica přicpějomneho docpěta – wšako běše plahowar dźiwiny wšitke trěbne wěstotne naprawy postajił: 1,8 metrow wysoki płót a 50 centimetrow šěroki podrywanski škit. Tola nichtó njebě zwólniwy wjelka zatřělić. K tomu zwólniwi hońtwjerjo a hajnicy běchu w zańdźenosći hustohdy njepřijomne rozestajenja ze zwěrinoškitarjemi dožiwili a so samo w sudniskich jednanjach z nimi roze­stajeć dyrbjeli. „To je jara emocionalna tema“, tehdy tež Stephan Meyer napřećo sćelakej MDR přizna.