Spočatk awgusta je jednaćelstwo mebloweho zawoda MAJA tzwr w Kulowje dźěławych a zjawnosć wo tym informowało, zo produkciju 31. decembra 2023 zastaji (SN rozprawjachu). Nětko předleži rozsud wujednarnje, jednaćelstwo a zawodna rada dźensa zdźělitej.

Kulow (SN/at). Postajenja su za nimale 450 sobudźěłaćerkow a sobudźěłaćerjow zawjazowace. Z tym, tak pisatej jednaćelstwo a zawodna rada, budźe rjadowane zawrjenje zawoda zaručene. Rozsud wujednarnje wopřijima tři dypki.

Wupowědźenja, kotrež wurostuja ze zawrjenja twornje, dźěłodawar hač do kónca nowembra wupraja. Hač do kónca decembra w zawodźe dale dźěłaja. Wot 1. januara 2024 móža dźěławi nowe dźěłowe městna nastupić. Za wupowědźenje płaći indiwidualna doba. Dočasnu změnu po 1. januarje 2024 nastupajo buchu tak „sprinterowe premije“ postajene.

Sprinterowa premija je dojednanje mjez dźěłodawarjom a dźěłopřijimarjom, z kotrymž móže dźěłopřijimar dźěłowy poměr jednostronsce dočasa zakónčić. Wón dóstanje wotnamakanje, kotrež dźěłodawar z lutowaneje mzdy dočasneho kónca dźěła dla financuje.