Nowy model za dnownu wodu we Łužicy su krajej a Zwjazk wobzamknyli

Drježdźany (SN/MG). Akterojo Zwjazka a zwjazkoweju krajow Sakska a Braniborska su zašły tydźeń model dnowneje wody za Łužicu schwalili. Mjez podpisarjemi běchu mjez druhim ministerstwa za škit klimy a wobswěta krajow a Zwjazka kaž tež zwjazkowe hospodarske ministerstwo.

Wšitcy wobdźěleni su sebi toho wěsći, zo je dołholětne wudobywanje brunicy we Łužicy ćežke škody zawostajiło. Tak praji na přikład sakski wobswětowy minister Wolfram Günther (Zeleni): „Wudobywanje brunicy je wodowy wobtok sylnje myliło. Přidatnje k tomu kopja so nětko sćěhi wudobywanja a změna klimy. Hospodarstwo trjeba wodu. We Łužicy wotwisuje wot toho tež, hač so změna strukturow šlachći.“ Po jeho měnjenju je nětko wobzamknjeny plan wažny zakład za dalewobstaće hospodarskeho regiona Łužica do přichoda.