Młodaj blidarjej w Błótach nałožujetaj nowe technologije

Tšupc (pb/SN). Dźeń 7. julij 2025 móhł so w stawiznach čołmikowanja z wuznamnym datumom stać. Ze sektom bu w Tšupčanskim přistawje swojorazny drjewjany čołmik wukřćeny. Na prěni pohlad drje wupada kaž znate čołmy w Błótach. Tomu polěkuje najskerje přirodna barba z korjenjow, z kotrejž je wobarbjeny. Hdyž pak sej čołm dokładnišo wobhladaš, spóznawaš, zo wobsteja nabóčne sćěny z pjeć worštow furněroweho drjewa. Tole rozkładźeštaj zawčerawšim jednaćelej Tšupčanskeho předewzaća „Vollholzschmiede“ Andreas Zimmer a Marcel Müller hosćom křćeńcy čołma. Z pomocu modernych prasow a nowych technologijow za lěpjenje hodźa so pobóčne sćěny hižo za čas zhotowjenja do kónčneje formy zhibować. „Tole je wažny krok a jedne z najwažnišich wašnjow postupowanja, kiž dyrbja so při twarje čołmow wobkedźbować. Drjewo so hižo z pomocu wohenja njezhibuje“, zwurazni Marcel Müller. Wón a Andreas Zimmer so předewšěm indiwidualnemu zhotowjenju meblow wěnujetaj.