Rakecy (SN/VaŽ). Z wubědźowanjom „Nowe puće za gastronomiju“ namołwja Towarstwo za wuwiće Hornjołužiskeje hole a hatow (OHTL) z.t. regionalnych akterow, inowatiwne a trajne ideje za gastronomiju wuwiwać. Hižo 2023 bě towarstwo we wobłuku regionalneje konferency w Radworju centralne prašenja wo přichodźe łužiskeje gastronomije tematizowało – wosebje nastupajo hódnotu regionalnych produktow a wužadanja zawodow we wjesnych kónčinach, rozprawja sobudźěłaćerka regionalneho managementa OHTL, Claudia Steglichowa. Zaměr wubědźowanja je, hóstne přemysło sylnić, regionalne wudźěłki widźomniše sčinić kaž tež nowe impulsy za turizm a lokalne zastaranje sadźeć. Hač do 4. awgusta móža so namjety za projekty zapodać, kotrež hodźa so w Leaderowej kónčinje hornjołužiska hola a haty zwoprawdźić. Kónčina wubědźowanja wopřija města Budyšin, Wóspork a Kulow kaž tež dwanaće dalšich gmejnow, mjez nimi Chrósćicy, Rakecy, Njebjelčicy a Worklecy. Požadać móža so předewzaća, kotrež steja za kreatiwnu, originelnu a trajnu skutkownosć.