Po zakónčenju šule zahaji něhdźe 2 400 młodych wotchadnikow šulow swoje powołanske wukubłanje. Mnozy z nich su to hižo loni w decembrje wo nje požadali, zo móhli swoje wukubłanje lětsa w awgusće abo septembrje započeć.

Budyšin. (SN/jp). Šula je zakónčena, a to lětsa samo z wjace wotchadnikami 10. lětnika hač do toho. Z tym je wjac šulerjow, kotřiž za wukubłanjom pytaja. Lětsa je so 2 400 młodostnych z wuchodneje a južneje Sakskeje wo wukubłanje w rjemjeslnistwje požadało. Mjez 71 powołanjemi powabichu so młodostni najčasćišo za mechatronikarja awtow, elektronikarja a mechanikarja připrawow za sanitarnu, tepjensku a klimowu techniku.

We wobwodźe Drježdźanskeje rjemjeslniskeje komory, ke kotremuž tež Budyšin słuša, něhdźe 1 000 bywšich šulerkow a šulerjow dualne wukubłanje zahaji. To je tróšku mjenje hač loni. W Kamjeničanskim wobwodźe je jich něhdźe 1 400 nowych požadarjow. Hospodarske struktury su tu rozdźělne.