Dźewjeć wuměłcow rězbari na 19. mjezynarodnej dźěłarničce skulptury z drjewa a kamjenja
Hayk Tokmajyan z Armenskeje wobdźěłuje najwjetši zornowcowy blok dźěłarnje. Ze zornowca nastanje skulptura nurjaceje so žony (horjeka nalěwo). Bernhard Männel, čłon towarstwa Kmjenjak z.t. dźěła na karpje ze zornowca. Porno mnohim rězbarjam wón při tym figuru kamjenjej přiměri a nic nawopak. Kónčny rezultat ma jako pućnik słužić. Pjericy pokazaja pozdźišo směr (horjeka naprawo). Indiski wuměłc Somen Debnath rězbari z drjewa łopjeno z dwanaće figurami, kotrež symbolizuja dwanaće měsacow lěta. Łopjeno wotbłyšćuje harmoniju z přirodu, w kotrejž so wšitko stajnje pohibuje (naprawo). Cvetanka Kirilova Schnorrbusch pochadźa z Bołharskeje. Hižo dołho w Leppersdorfje bydli. Wona zhotowja z pěskowca jara wosobinsku twórbu. Skulptura pokazuje na wjacore generacije žonow – wot wowki přez mać hač k njej samej (nalěwo).Proch so w powětře znošuje a motorske piły nimale w takće haruja: W Miłočanskej skale tuchwilu zaso wuměłstwo tworja. 19. króć je Miłočanska skała wotewrjena dźěłarnja.
