Mobilny zetkawanski format z kulinariku a bjesadu

Miłoćicy (SN/MiR). Předsydu towarstwa Kamjenjak z.t. Huberta Langu zaběra pačenosć towaršnosće w našim regionje a wón chce něšto přećiwo tomu činić. Tuž so w iniciatiwnej dźěłowej skupinje „Krabatowy nowy duch“ w Krabatowym towarstwje z.t. angažuje. „Smy jako čłonojo skupiny a akterojo w dwurěčnym regionje kruće zakótwjeni“, wón rjekny „a mamy so wo rozrisanje towaršnostnych problemow starać.“ Tohodla chcedźa regionalne produkty bóle šěrić, z producentami rěčeć a dopokazać, zo móže łužiski region, hladajo na předźěłanje swojich produktow, we wyšej klasy „gourmet“ sobu rěčeć. K tomu słuži projekt „Diner z Krabatom“, kotryž su skupina „Krabatowy nowy duch“, Krabatowe towarstwo z.t a Kamjenjak z.t. wuwili. „Chcemy regionalnu politiku na njewšědne wašnje diskutować. Při woptawanju kulinariskich drohoćinkow so iniciatorojo nadźijeja, zo wuwija wobdźělnicy při bjesadźe progresiwne mysle za rozrisanje aktualnych towaršnostnych wužadanjow w Krabatowym regionje.