Tři regionalne předewzaća je Marketingowa towaršnosć Hornja Łužica-Delnja Šleska (MGO) póndźelu w Zhorjelcu na swjedźenskim zarjadowanju z Hornjołužiskim předewzaćelskim mytom počesćiła.

Zhorjelc (AK/SN). Dobyćerjo 30. Hornjołužiskeho předewzaćelskeho myta su: Wojerowska molerska firma ZMalerei, twarske předewzaće OSTEG tzwr ze Žitawy a serwisowe předewzaće za chłódźensku a tepjensku techniku Beyer tzwr z Markersdorfa pola Zhorjelca. Cyłkownje 23 regionalnych předewzaćow z hospodarskich wobłukow industrija, rjemjesło a posłužby běše nominowanych.

Hladajo na lětuše hesło „Přichod zawěsćić – fachowcow zdobywać a dźeržeć“, pod kotrež běchu zamołwići myto stajili, wuzběhny krajny rada dr. Stephan Meyer (CDU) w swojej narěči w Zhorjelskim Kulturnym forumje synagoga, zo „zdobywaš a zdźeržiš sej fachowcow wosebje z pomocu dobreje předewzaćelskeje kultury, w kotrejž dobre dźěło připóznawaš a w kotrejž ludźi dołhodobnje zahorješ“. Lětuši dobyćerjo su najlěpši wuraz toho, wón přispomni.