Budyšin/Drježdźany/Berlin (SN/mb). Z nowym etatom Zwjazka njeje wjetšina w zwjazkowym sejmje na kolijach Sakskeje ničo zahibała – tež elektrifikacija železniskeje čary mjez Drježdźanami a Zhorjelcom wostanje dale přeće nic jenož regionalnych politikarjow kaž Marka Šimana (CDU). Wón mjenuje wobzamknjeny klětuši etat w tutym nastupanju „dezaster za Saksku“ a skedźbnja na to, zo pólscy a čěscy susodźa za technisku stagnaciju na čarje Drježdźany-Zhorjelc resp. za dlijacy so nowotwar čary Drježdźany-Praha zrozumjenje nimaja. Nowa trasa by čas jězby mjez sakskej a čěskej stolicu wo wjac hač hodźinu redukowała.