Saněrowanje Hórnikečanskeho jězora znowa přičina za konflikt

Łaz (AK/SN). Wot spočatka nowembra skruća Łužiska a srjedźoněmska towaršnosć hórnistwoweho zarjadnistwa (LMBV) wotrězk přibrjoha na wuchodźe Hórnikečanskeho jězora, kotryž je suwanjow dla njewěsty. Tuchwilu přihotuja zamołwići dno jězora za planowane zhusćenje, kotrež chcedźa klětu w februaru zahajić. Cyły wot suwanjow wohroženy wobłuk ma hač do lěta 2029 skrućeny być, mjez druhim tež z pomocu přidatnych nasypow. Hakle po tym je pohódnoćenje ze stron wěcywustojnych móžne a „hakle po tym móžemy jasne informacije podać, w kotrej měrje je jězor zaso wužiwajomny“, podšmórny nawoda wotrjada za projektny management pola LMBV Karsten Handro wutoru na posedźenju gmejnskeje rady we Łazu. Hižo wot lěta 2014 je Hórnikečanski jězor dospołnje zawrjeny.