Energijowe drustwo z wjele zajimcami w Radworju załožene

Radwor (SN/BŠe). Wažny měznik za dołhodobne zastaranje wobydlerjow Radworskeje gmejny z ćopłotu a energiju bu wčera docpěty. Energijowe drustwo ­„Witaj – wir leben Energie“ je załožene. Zajimcow za to je dosć a nadosć, štož ­ličba hosći w Radworskim hosćencu ­„Meja“ dopokaza. Tam dyrbjachu zamołwići stólcy přistajić. Energijowy manager gmejny Marcel Bellmann na spočatku zhromadźizny na to skedźbni, zo je załoženje drustwa logiska konsekwenca prócowanjow minjeneju dweju lět. Nětko je w gmejnje zjednoćenstwo trěbne, kotrež so wo zwoprawdźenje projektow stara. Jedyn z hłownych akterow, kotryž měješe minjene lěta w gmejnje předewšěm ćopłotne syće na starosći, je předewzaćel Tomaš Rječka z Kamjeneje. Kaž wón wčera přizna, jeho ideja, energijowe drustwo wutworić, hižo tójšto lět zaběra.