Budyšin (SN/BŠe). Němska wjedrowa słužba je wčera a dźensa w nocy warnowała, zo budu dróhi předewšěm na wuchodźe Sakskeje a tež w Hornjej Łužicy hładke. Wěšćenja so wobkrućichu, lód bě z blakami wjacore centimetry tołsty. Šoferojo mějachu w zažnych rańšich hodźinach lubu nuzu, so na hładkich dróhach pohibować. Kaž wobchadne předewzaće Regiobus zdźěli, njejsu busy rano wot 4 hodź. regularnje jěć móhli. „Wjedra dla so tuchwilu w cyłej syći linijow busy zapozdźa abo scyła njejědu“, pasažěrojo na internetnej stronje čitachu. Tole potrjechi tež Radworske busowe předewzaće SchmidtSchwarz. Jednotliwe busy pak su přiwšěm jěli, wottam rěka. Wot ranja w 7 hodź. počachu busy zaso jězdźić, přiwšěm dyrbjachu ludźo z wupadami a zapozdźenjemi ličić. Internetne strony wobchadneju zaměroweju zwjazkow ZVON a VVO běchu nachwilnje přećežene, dokelž ludźo za zwiskami hladachu a so tam informować spytachu.