Wojerowski klinikum ma sobudźěłaćerjow z wjace hač 30 narodow

Wojerecy (AK/SN). Wojerowski klinikum Łužiska jězorina je nowe lěto z wysokej ličbu pacientow zahajiło. Tuchwilu maja tam wjace hač 300 pacientow. „Spočatk lěta bě wjele pacientow w zwisku z wobchadnymi njezbožemi, z gripu, z ćežkimi infekcijemi dychanskich organow a korony dla w chorowni. 25 schorjenych lěkujemy tuchwilu na influencu. Přidatnje poćežuje nas wysoki chorobny staw sobudźěłaćerjow. To je wužadanje“, wuswětli jednaćelka Juliane Kirfe njedawno na lětnej rozmołwje z nowinarjemi.

Cyłkownje zhladuje wona na dobre lěto 2025. Klinikum zwěsća, zo je wukony stopnjował. Ambulantne operacije přiběraja. Cyłkownje su lěkarjo loni 8 374 operacijow přewjedli, to je něhdźe 100 wjace hač w lěće 2024. Z nich bě 3 319 ambulantnych, a z tym 800 wjace hač lěto do toho. 501 dźěćo so loni we Wojerowskim klinikumje narodźi. W přerězku su pacienća pjeć dnjow w klinikumje přebywali. To je něšto mjenje hač w lěće 2024. „Hospodarsce wotličimy lěto 2025 po wšěm zdaću z čornej nulu. W lěće 2024 mějachmy minus 2,5 milionow eurow“, Juliane Kirfe rozłoži.