Drježdźany (SN). Na wysokich šulach a šulach w Sakskej maja so studowacy a wuknjacy dale na stawki nastajić. Za­wčerawšim běchu hižo kubłanišća wokoło Lipska potrjechene, dźensa sćěhowachu stawki w Drježdźanach. Kaž dźěłarnistwo za kubłanje GEW zdźěli, chcedźa přichodny tydźeń stawki rozšěrić. Tak maja studowacy a wuknjacy póndźelu w Šwikawje z tym ličić, zo hodźiny wupadnu. Srjedu budźe tomu tak we wobłuku Zhorjelca a dźensa za tydźeń su stawki w a wokoło Budyšina předwidźane.

Pozadk tuchwilnych stawkow su tarifowe jednanja přistajenych w zjawnej słužbje krajow. Dźěłarnistwo žada sej znajmjeńša 300 eurow wjac na měsac. Přichodne koło jednanjow je w februaru planowane. Strona dźěłodawarjow kritizuje postupowanje dźěłarnistwa GEW. W minjenymaj jednanskimaj kołomaj běchu hižo prěnje wuslědki widźomne. „Běchmy na dobrym puću“, dźěłodawarjo informuja. Tak su woni centralnym žadanjam dźěłarnistwa přihłosowali.