Wojerecy (AK/SN). Wojerowski klinikum Łužiska jězorina hižo wot nowembra swój wobłuk za operacije ponowja (SN wčera informowachu). Hač do junija maja rumnosće hotowe być. W juliju chcedźa fachowcy medicinsku techniku instalować, tak zo móže chorownja wot septembra w ponowjenych rumnosćach dźěłać. „Tuchwilu wšitko po planje běži. Najebać twarskeje naprawy móžemy dale operować“, wuzběhny jednaćelka klinikuma Juliane Kirfe zawčerawšim na lětnej rozmołwje z nowinarjemi. Plan za operacije w tutych wuměnjenjach su swědomiće zestajeli. Cyłkowne kóšty za modernizowanje wučinjeja 7,1 milion eurow. 6,5 milionow eurow z toho Zwjazk a swobodny stat ze zakonja za inwesticije w brunicowych kónčinach spěchujetej.