Campingowanišća we Łužicy hotuja so do swjatkow na nawal ludźi

Budyšin (SN/jp). Na proze do dołheho kónca tydźenja wokoło swjatkow so mnozy – hač poriki, swójby abo wuměnkarjo – tež na campingowanišća we Łužicy měrja. Wšako je wjele wólneho časa při najrjeńšim lěćnym wjedrje mnohim dobra składnosć, so hromadźe na dźesać do pjatnaće kwadratnych metrach tłóčić a sej tak wotpočiniski kónc tydźenja lubić­ dać.

W Haselbachtalu na campingowanišću „Při łučinje" su wšitke městna ska­zane. Tuta ležownosć je dawno tajny tip za campingowy dowol. Doł skići měrne kolesowarske pućiki, kotrež bjez wulkeho napinanja zmištruješ. Silvio Berger, kotryž je mějićel tuteje ležownosće, poskića hosćom kóžde ranje serwis z čerstwymi całtami. Z přidatnej kupjelu, kotraž wopřija basenk, wabi tež druhich ­hosći, kotřiž chcedźa so wochłódnić. Za campingowarjow je zastup do kupjele darmotny, štož wězo rady wužiwaja. Popłatk za městno za caravan Silvio Berger zwyšił njeje a z tym so hišće wjace hosći nadźija hač loni.