Astrocentrum Łužica w horcej fazy europskeho wubědźowanja

Nowoslicy (SN/jp). Blisko Nowoslic su njedawno započeli, hłuboke dźěry točić. Z tutymi dźěrami chcedźa wědomostnicy w nadawku Techniskeje uniwersity Drježdźany dokładne geologiske informacije za planowany Einsteinowy teleskop zezběrać. Astrocentrum Łužica (DZA) prócuje so wo to, w zwisku z nastawacym wulkim podzemskim laborom za přepytowanje grawitaciskich žołmow ze swětnišća tež tónle teleskop zaměstnić. „Z wudobytymi hódnotami chcemy zwěsćić, kak wupadaja geologiske hódnoty abo kak sylna je seismiska aktiwita, dokelž trjebamy za Einsteinowy teleskop jara měrne wobstejnosće a dyrbimy za měrnym blečkom pytać“, tak Jan Winša, doktorand na TU Drježdźany. Młody fyzikar je do wuwiwanja DZA zaplećeny.