Mjezynarodnje agěrowace předewzaće na łužiske temy skedźbnjeć

Budyšin/Zirndorf (SN/MiR). Zaměr serbskich institucijow a zarjadnišćow je, dźeń a wjace tež serbsce njerěčacych ludźi za serbsku rěč a kulturu zajimować abo jich na pozabyte dožiwjenja a nazhonjenja ze Serbami a Łužicu dopominać. Tajkile wotmysł mjezynarodnje skutkowaca firma za hrajki Playmobil ze swojimi wosebitymi figurami z regionalnym koloritom podpěruje. „Wobkedźbujemy, zo su temy kaž domizna, kulturelna identita, tradicija a regionalne wosebitosće mnohim ludźom wjele hódne“, wotmołwi na naprašowanje SN rěčnica předewzaća Nina Eberth. Hač bychu tež figuru, typisku za dwurěčnu Łužicu produkowali? Wona zdźěli: „Łužica z jeje wosebitymi stawiznami, z jeje kulturnej bohatosću a z jeje serbskim namrěwstwom skići bjezdwěla zajimawe dypki nawjazanja.“ Tole wšak hišće njedosaha. „Wuwiwamy wosebite figury zasadnje jenož zhromadnje z regionalnymi partnerami. Tuž njemóžemy móžne přichodne projekty tuchwilu komentować a tajke tež nic připowědźić.