Lětuši zwjazkowy dźeń wotewrjeneho dwora su minjeny pjatk w Koćinskim Krabatowym mlokowym swěće zahajili. W srjedźišću dnja steješe prašenje, kak móhli w časach swětowych krizow a změny klimy zastaranje ludnosće ze zežiwidłami zaručić.

Koćina (SN/MiP). Tobias Kockert, jedyn z dweju jednaćelow Krabatoweho mlokoweho swěta, hnydom na spočatku zarjadowanja w swojich postrownych słowach wuzběhny, wo čo na dnju wotewrjeneho dwora dźe: „wobydlerjam w regionje wšědne dźěło ratarjow předstajić a jim na tute wašnje znazornić, kelko prócy w kóždym jednotliwym zežiwidle tči“. Koćinski zawod wšak sćěhuje hižo wot spočatka filozofiju wotewrjeneho zawoda. „Zajimcy móža so na 365 dnjach wob lěto pola nas za wjedźenje po zawodźe přizjewić“, wón doda.