Stefan Šmit je so z Měrkom Domašku wo wólbach wjesnjanosty w Njebjelčanskej gmejnje rozmołwjał

Knježe Domaška, před dobrym tydźenjom sće we wólbach wjesnjanosty w Njebjelčicach najwjace hłosow dóstał, hačrunjež njejsće scyła jako kandidat na lisćinje stał. Kak je to móžno?

Nó haj, to sam scyła tak wotmołwić njemóžu. Myslu sej, zo je sej wjetšina wobydlerkow a wobydlerjow našeje gmejny přała, zo so solidny puć našeho dotalneho wjesnjanosty Andreja Bulanka tež přichodnje dale wjedźe. Tohodla su za kandidatom pytali, kotryž móhł tole dale garantować.

Sće hižo z tajkim wuspěchom ličił, jako su po prěnim wólbnym kole w Njebjelčicach a w zarjadniskim zwjazku w Pančicach-Kukowje wólbne lisćiki wuličili?