Sport (04.11.16)
Poskitk koparskim sudnikam
Drježdźanski koparski zwjazk přewjedźe wutoru, 8. nowembra, w 19 hodź. w Drježdźanach (Gerhart-Potthoff-Bau 81, Hettnerstr. 3) zhromadźiznu za koparskich sudnikow. Na njej smědźa so tež sudnicy Zapadołužiskeho koparskeho zwjazka wobdźělić a sej hodźiny za podlěšenje licency přiličić dać. Přednošować budźe profisudnik Sascha Stegemann. Přizamknje so podijowa diskusija wo poměrje sudnika k hrajerjam ze Saschu Stegemannom z koparjom Dynama Stefanom Kutschku a ze sportowym reporterom Ronnyjom Maiwaldom.
Volleyballistki doma hraja
Pančičanske volleyballistki změja njedźelu we wokrjesnej klasy-stafla sewjer swój prěni domjacy hrajny dźeń w sezonje. W 10 hodź. nastupja w sportowni Šule Ćišinskeho ST Marijina hwězda II přećiwo Marijinej hwězdźe III, wot 11 hodź. ST Marijina hwězda III přećiwo MSV Budyšinej 04 III a wot 12 hodź. Marijina hwězda II přećiwo MSV Budyšinej 04 III.
ARD/ZDF-turněr
Klóšterskej rezerwje tež zaso na parkeće
Tež žónskej volleyballowej cyłkaj ST Marijineje hwězdy II a ST Marijineje hwězdy III stej we wokrjesnej klasy hižo do sezony startowałoj, a to minjeny kónc tydźenja w Budyšinje. Za třeće, dorostowe mustwo, kotrež trenuje Anne Šołćic, bě to scyła prěni hrajny dźeń. A wone je so derje prezentowało. Za trenarku je wažne, zo zbliža sej holcy powšitkowny wotběh hrajneho dnja. Wone pokazachu, zo zamóža so na přećiwnika nastajić. Jich nazwučowarka móže tuž optimistiska być. Jeje dobre dźěło je tež Ralf Wachsmann w treningowym lěhwje wobkrućił. Nažel njebu wuwiće mustwa honorowane. Młode hwězdźički podležachu woběmaj přećiwnikomaj, MSV Budyšinej 04 III a Módro-běłym Wojerecy II z 0:2.
Za Pančicy III hrajachu: Marie Caspar, Emma Gerntkec, Helena Hejduškec, Sophie Hejduškec, Carolin Neitsch, Judith Pjetašec, Nele Pjetašec, Kira Hrjehorjec, Tereza Zelnakec, Verena Suchec a Anna-Katharina Cyžec.
Serbska šestka w Kulowje šesta
Kondicija pobrachowała
Na prěnim domjacym hrajnym dnju Marijnych hwězdźičkow móžachu so přihladowarjo na napjatej hrě wjeselić. Hižo prěni duel přećiwo načolnikej bě wosebity wjeršk. Na wukony předchadźaceje sezony pak hosćićelki bohužel nawjazać njemóžachu.
ST Marijina hwězda – Koblicy 1:3
(25:10, 16:25, 25:27, 16:25)
W prěnjej sadźbje zdeklasowachu Marijine hwězdźički znateho přećiwnika z Koblic. Na wysokim niwowje wone jemu pokazachu, što w nich tči. Za nje wšitko derje běžeše, a nowopřichad Jana Kralec so derje integrowaše. W jeno 13 mjeńšinach bě dobyće sadźby jasne. Přihladowarjam skićeše so wulkotny sport. Kobličanki pak so zhrabachu a w druhim přechodźe konterowachu. Při stawje 9:14 wuměni trenar Ralf Wachsmann Christin Opicec. Z nowej nadběhowarku Constancu Gühmann nastaštej tróšku lěpši blok a nadběh. Woboje pak ničo ličomneho njewunjese. Hrajerki z Koblic běchu jasnje lěpše a wědźachu njewěstosće domjacych wužiwać. W třećim a tež w štwórtym přechodźe so swójske zmylki pola Marijnych hwězdźičkow kopjachu. Dale a wjac nadaćow njedocpěwaše polo přećiwnika, tež blok njebě wuspěšny.
Napjatosć hač do kónca knježiła
Traktor Malešecy
– SJ Njebjelčicy 5:3 (3:2)
Zestawa hosći: Ričel – Kral, Haška, Zeller, Hanuza, Cyž, Hommel, Čornak (82. Lejnart), Hrjehor, Pawlik, Korjeńk
Prěnja šansa Njebjelčanskich koparjow w 12. min. dźěše jenož na łatu. Domjacy to kusk lěpje sčinichu. W 16. min. startowaše jich nadběhowar Marco Benad solo a wotzamkny k nawjedowanju. Štyri mjeńšiny pozdźišo steješe škitar Clemens Meier sam w hóstnej šěsnatce, wužiwaše składnosć a zwyši na 2:0. Agilny Benad měješe dalše móžnosće, njezamó pak wrotarja Njebjelčanow Daniela Ričela přewinyć. W 37. min. trjechichu Malešenjo 3:0. Nětko tež hosćo wotućichu a Ronny Hanuza přetwori po róžku na 3:1 (38.). Zmylki a dospołny njeporjadk w domjacym škiće pochłosta Tommy Hommel a skrótši na 3:2 (39.).
Wysoka poražka w pokalnej hrě
Berlinjenjo Energiju Choćebuz přesćahnyli
Z wulkimi słowami bě sej trenar regionalneho koparskeho ligista FC Energije Choćebuz Claus-Dieter Wollitz na nowinarskej konferency do hry přećiwo Berlinskemu AK hosći chwalił. Wollitz postara so wo zadźiwane mjezwoča. Zo so wuprajenja ke klewernosći, strašnosći před wrotami a njewobličomnemu hraću na kóncu partije tak jasnje wobkruća, nochcyše do toho nichtó za wěrne měć. FC Energija pokaza hodźinu dołho wobhladanjahódne kombinacije, z kotrychž nastachu tu a tam strašne akcije před wrotami přećiwnika. W 69. min. bě skónčnje Benjamin Förster na městnje. Bul bě wot łaty do pola skočił, a wón přetwori k 1:0. Wjeselo pak traješe jeno tři mjeńšiny. Třělwa Hasana Pepića wjedźeše k překwapjacemu wurunanju. Nětko bě rytmus Energije nadobo myleny. Ničo so hižo njeporadźi, hosćom pak za to samo 1:2 (85.) přez Myroslava Slavova.
Wuslědki (02.11.16)
Krajna koparska klasa
Nowe Město – Biskopicy II 1:0 (1:0)
Mužakow – Chrósćicy 3:3 (1:1)
1. Radebeul 8 20 : 8 21
2. Neugersdorf II 8 27 : 9 19
3. Laubegast 8 22 : 8 19
4. Nowosólc-Hródk 9 19 : 15 16
5. Mužakow 8 16 : 14 14
6. Drježdźanski SC 8 19 : 17 10
7. Weixdorf 8 15 : 16 10
8. Nowe Město 8 12 : 16 10
9. Chrósćicy 9 14 : 19 9
10. Zschachwitz 8 15 : 25 9
11. Horni kraj-Sprjewja 9 17 : 24 8
12. Trjebin 9 13 : 25 7
13. Biskopicy II 8 9 : 22 2
wokrjesne pokalne koło
Arnsdorf II – Lieg.-Augustusbad 1:7 (1:1)
SV Hermsdorf II – Bukecy II 1:3 (1:2)
Budyšin II – Wulka Du./Minakał 1:0 (0:0)
Malešecy – SJ Njebjelčicy 5:3 (3:2)
Arnsdorfske KT – Kinsp./Łužnica 3:2 (3:1)
ST Kubšicy – Großröhrsdorf II 0:1 (0:1)
SC Kleinhänchen – FSV Łuty 2:1 (2:0)
ST Hodźij – Rakečanske ST 0:10 (0:7)
Łaz/Běły Chołmc – ST Wjelećin 1:0 (0:0)
Wětnica/Hola – TSV Wachau 1:0 (0:0)
Wojerowski FC – Mot. Kumwałd 7:1 (2:1)
LSV Hory II – ST Lubuš 3:2 (0:0)
TSV Wachau II – ST Mar. hwězda 3:0 (1:0)
FSV Minakał – SV Hermsdorf 1:18 (1:6)
Hlinowc – Němske Pazlicy 1:2 (0:0)
Sepicy II – ST Hnašecy-Dobruša II 1:5 (1:1)
ST Kinspork/Łužnica II – Sepicy 1:5 (1:3)
ST Wjelećin III – Droh. Ramnow 0:5 (0:1)
SV Haselbachtal – Kulow 2:3 (1:3)
Bretnig-Hausw. II – Wjernarjecy 0:2 (0:1)
Rakecy II – Ottendorf-Okrilla 1:3 (0:0)
SJ Chrósćicy II – ST Ćisk 0:9 (0:4)
Nadr. Hrabowka – Ralbicy/Hórki 3:5 (0:2)
ST Drjewnica – ST Wjelećin II 5:1 (2:0)
SG Großnaundorf – ST Budyšin 5:1 (4:0)
Biskopicy III – Póst Ger. Budyšin 0:3 (0:0)
Cyle z połneho čerpać so nješlachćiło
Čerwjeno-běli Mužakow
– SJ Chrósćicy 3:3 (1:1)
Zestawa hosći: Králíček – Pöpel, Cyž, Sentivan, Šafář, Hillmann (88. Dórnik), Runt, Domaška, Henčl (84. Młynk), Žur, Věchet
Započeć hodźi so rozprawa ze samsnej sadu minjeneje rozprawy mojeho kolegi a sobuhrajerja Clemensa Šmita. Do hry bychu přiwisnicy a koparjo Chróšćanskeje SJ z dypkom spokojom byli, po hrě pak běše mjerzanje wulke, zo njejsu 2:3 přez čas wuchowali.
Kolesowali a běhali
Dwanaty raz bě minjenu njedźelu Budyske kolesowarske towarstwo (RSV) zhromadnje z Radworskim kupowym towarstwom přeprosyło na kolesowanje a běhanje w haju mjez Młynskimi chěžemi a sportnišćom. Tež słónčne wjedro so wo to postara, zo bě nimale 250 sportowcow z cyłeje srjedźneje Němskeje kaž tež Pólskeje a Čěskeje do Radworja přijěło.
Technisce wotměnjawa a zdźěla spektakularna čara bě zaso derje spřihotowana, tak zo móžachu ju jako prěnje dźěći starobow U 11 a U 13 pod póduše brać. Kaž kóžde lěto běštej zaso Radworskej šuli derje zastupjenej – pokal za šulu z najwjace wobdźělnikami dźěše na zakładnu šulu. Tola tež wukony móžachu so widźeć dać. Pola mjeńšich dźěći, kotrež dyrbjachu něhdźe 2 km dołhe koło běžeć, móžeše so Leandra Bohotec ze zakładneje šule nad dobyćom pola holcow wjeselić. Tež 4., 5. a 6. městno wobsadźichu Radworske šulerki Charlott Paškec, Isabella Grubertec a Sarah Tietzec.
