Zniža płaćiznu

Montag, 01. Oktober 2018 geschrieben von:
Hamburg (dpa/SN). Hladajo na tunje płaćizny kofeja na mjezynarodnych wikach je Hamburgski koncern Tchibo připowědźił, dźěl swojeho sortimenta potuńšić. Tři družiny kofeja budu přichodnje wo 40 centow na punt tuńše, kaž přede­wzaće zdźěli. Pozadk niskich pła­ćiznow su dobre žně wosebje woblubowanych kofe­jowych bunow Arabica w Brazilskej. Na wikach płaćeše punt njepraženeho kofeja zdźěla mjenje hač jedyn dolar. Tak leža płaćizny kofeja pod produkciskimi kó­štami, wuzběhny towarstwo TransFair na dźensnišim mjezynarodnym dnju kofeja. Kofej je tak tuni kaž nihdy do toho. Ratarjo a wobswět pak za to płaća. „Buram, kotřiž kofej plahuja, dyrbja wot­powědnu mzdu garantować, zo móža ­dale kofej plahować“, podšmórny Dieter Overath z towarstwa TransFair.

Wojuja zhromadnje přećiwo drogam

Montag, 01. Oktober 2018 geschrieben von:

Zhorjelc (SN/BŠe). Něhdźe 100 zastojnikow policije wojewódstwow Dolny Śląsk a Lubuskie kaž tež zastupjerjo Zhorjelskeje policajskeje direkcije su so dźensa tydźenja na zhromadnej konferency zetkali. W kulturnej piwarni rozjimachu wuslědki zhromadneho projekta k wojowanju přećiwo drogowej kriminaliće. Zmóžnił bě so projekt přez Europski spěchowanski program Interreg Pólska-Sakska. Minjenej dwě lěće běchu zhromadnje projekt pod hesłom „Ně k drogam!“ přewjedli a tak eficientnje na mjezy mjez Němskej a Pólskej hromadźe dźěłali.

Sakski sekretar za nutřkowne naležnosće prof. dr. Günther Schneider so wobdźělnikam za intensiwne prócowanja dźakowaše. Konsum drogow a z tym zwisowacu kriminalitu wobstaranja policija wšědnje we woběmaj krajomaj dožiwja. Maršal wojewódstwa Dolny Śląsk Cezary Przybylski zwurazni, zo je angažement zastojnikow přewšo wažny, skutkownje napřećo drogam kaž crystal, cannabis abo tak mjenowanych legal highs wo­jować.

Ze 110 metrami najwyši wuheń Budyšina bu wčera z pomocu 30 kilogramow dynamita rozbuchnjeny. Do toho dyrbjachu 30 wobydlerjow a sobudźěłaćerjo 15 přede­wzaćow kónčinu wopušćić. Wuheń padny, kaž bě wot fachowcow předwidźane, na přihotowanu­ přestrjeń. Foto: Carmen Schuman

Rybarstwo łužisku kónčinu charakterizuje

Freitag, 28. September 2018 geschrieben von:

Podpěra wobhospodarjam wodźiznow wažny stołp Leaderoweho regiona Hornjołužiska hola a haty

Wot časa pomjenowanja Leaderoweho regiona Hornjołužiska hola a haty před dźesać lětami su hižo mnohe projekty zwoprawdźili. Wobłuki toho su najwšelakoriše a sahaja wot infrastruktury přez turizm hač k hospodarstwu a by­dlenjam předewšěm za młode swójby, kotrež chcychu twarsku substancu na wsy zachować a dale wužiwać. Při tym su hłowne zaměry regionalne two­rjenje, žiwjenska kwalita, kooperacija a dwurěčnosć, skrućenje zhromadnosćow a wuwiće přirody. Serbske Nowiny chcedźa so spěchowanym wjerškam přichodnje wěnować a je bliže před­stajić.

Kaž mjeno Leaderoweje kónčiny Hornjołužiska hola a haty hižo přeradźa, wodźizny region charekterizuja, štož měło so wězo tež přichodnje zachować. Přiroda dźě słuša k žiwjenskej kwaliće woby­dlerjow a zaruča zdobom wěsty dźěl ho­spodarstwa kaž rybarstwo. Njezadźiwa tuž, zo so tomu tež spěchowanski program wěnuje.

Za dwě lěće 200 nowych dźěłowych městnow

Donnerstag, 27. September 2018 geschrieben von:

Symbolisce z prěnim zarywom je předewzaće Hamburger Rieger tzwr wčera w Čornopumpskim industrijnišću zapo­čało druhu papjercowu mašinu twarić. Z inwesticiskej sumu 370 milionow eurow ma 200 nowych dźěłowych městnow nastać.

Čorna Pumpa (JoS/SN). Nowu připrawu PM 2 chcedźa w druhim połlěće 2020 startować. Z njej rjećaz wudźěłkow a rozrost předewzaća dale wjedu, kaž managing direktor Hamburger Containerbord Harald Ganster zawodnje wuzběhny. „Tak zwyšimy w produkciskim segmenće su­ro­weho běłožłobičkateho papjerca kapacitu na jedyn milion tonow. Nimo toho je bruny žłobičkaty papjerc, wšo na zakładźe sto procentow stareje papjery.“ Ganster mjenuje nowu papjercowu mašinu „najwjetši jednotliwy projekt w stawiznach předewzaća“.

Strózbe ličby wozjewili

Mittwoch, 26. September 2018 geschrieben von:

Drježdźansko-Mišnjanske a Zhorjelske biskopstwo zlemjenej

Drježdźany/Zhorjelc (SN). „Mje je to zlemiło a mi to njesměrnje boli: Ja so za to hańbuju, zo su duchowni a rjadnicy čłowjesku dostojnosć dźěći, młodostnych a škitancow z nohami teptali“, zdźěli Drježdźansko-Mišnjanski biskop Heinrich Timmerevers hladajo na wčera wozjewjenu studiju znjewužiwanja njepołnolětnych přez měšnikow, diakonow a rjadnikow. Biskopstwo chce konsekwentnje pady rozrisać, kotrež samozrozumliwje zhromadne dźěło statnych zarjadow zapřija.

Projektnej lisćinje přihłosowali

Dienstag, 25. September 2018 geschrieben von:

Łaz (AK/SN). Zaměrowy zwjazk Łužiska jězorina Sakska chce w časowej dobje mjez lětom 2018 do 2022 cyłkownje 18 zakładnych projektow zwoprawdźić. Tole podšmórny jednaćel Daniel Just na njedawnym posedźenju zwjazka we Łazu. Radźićeljo jednohłósnje projektnej lisćinje a prioritnym jednanjam přihłosowachu. Kóžde lěto ma so lisćina přepruwować a aktualizować. Za kóždy projekt pak je hišće swójske wothłosowanje radźi­ćelow trěbne.

„Spočatnje smy sej 160 móžnych projektow wobhladali“, Daniel Just rozkładźe. „Kónc meje z radźićelemi wo tym wuradźowachmy. Předewšěm chcemy ideje wěstotneje potrjeby a wjetšim spěchowanjom zwoprawdźić.“ Po šestym ­zarjadniskim zrěčenju mjez Zwjazkom a krajemi su mjenujcy dosć financielnych spěchowanskich móžnosćow.

Teorija, zo na suchej łužiskej pódźe jenož chójna rosće, hižo njepřitrjechi. Znajmjeńša płaći tole za lěsny wobwod, kotryž mjeztym hižo 18 lět swobodnemu knjezej Sebastianej von Rotenhan słuša. Nimo toho wobsedźi wón hišće lěsne přestrjenje wokoło Jabłońcy, Kromole a Mužakowa.

Z bliskosće Bamberga pochadźacy swobodny knjez je 69 lět stary, bě cyły čas swojeho žiwjenja lěsy wobsedźał, štož jeho powołanske žiwjenje charakterizowaše. Tež hospodarsce z jednym po cyłej Němskej najwjetšim drjewopředźěłacym předewzaću jeho tematika stajnje přewodźeše. Mjeztym ma bywši Bayerčan we Łužicy swoju domiznu a bydli w Ruśi (Reuthen). Wottam organizuje wón přetworjenje lěsa w Mužakowskim zahórku a je přewšo wuspěšny, wuslědki dźě su dotal spokojace. Wo tym zhonichu wopytowarjo 10. wodoweho a přirodoweho dnja njedawno w Grodkowskej wodarni. Regionalny zwjazk Nabu a tamniši zaměrowy wopłóčkowy zwjazk běštaj zarjadowanje zhromadnje přihotowałoj.

Za kubłanski dowol pjeć dnjow

Montag, 24. September 2018 geschrieben von:
Drježdźany/Budyšin (SN). Němski dźěłarniski zwjazk Sakskeje (DGB) je pjatk w Drježdźanach kampanju za zakoń zahajił, kotryž rjaduje wuswobodźenje dźěławych z dźěła, zo bychu so dale kubłali. „Pjeć dnjow chwile. Kubłanje za Saksku“ rěka hesło akcije, z kotrejž wabi dźěłarnistwo přichodne měsacy wo wulku podpěru. „Čas žiwjenja wuknyć je w dobje digi­talizacije trěbne, zo bychmy wužadanjam dźěłoweho swěta zrosćeni byli“, wuzběhny Anne Neuendorf, zastupowaca předsydka DGB Sakskeje. Nimo Sakskeje a Bayerskeje maja we wšitkich zwjazkowych krajach zakoń wo wuswobodźenju kubłanja dla. Prawo na kubłanski čas je naležnosć zwjazkoweho kraja. Sakski krajny sejm móže jón jednorje wobzamknyć. Tohodla wojuje dźěłarnistwo wo pjeć dnjow zapłaćeneho dowola na lěto, zo móhł so dźěławy powołansce, politisce, socialnje abo kulturnje dale kubłać. Z wida DGB słušatej swětaj dźěła a žiwjenja dźensa hromadźe, požadanych pjeć dnjow je „nuznje trěbny zakład“. Kampanju podpěruja dotal sakski minister za hospodarstwo a dźěło Martin Dulig (SPD) a politikarjo Lěwicy a Zelenych.

Plahowarjow rybow lětsa wosebje podpěrać

Montag, 24. September 2018 geschrieben von:

Rakecy (SN/BŠe). ,,Podpěrajće rybarjow a kupće rybu“, namołwješe zastupowacy prezident sakskeho rybarskeho zwjazka Georg Stähler zawčerawšim na zahajenju 17. rybowych tydźenjow při Rakečanskim hrodowym haće. Lětsa su zarja­dowanje znowa ze sakskej karpowej sezonu na jednym městnje přewjedli, tak zo je tójšto prominentnych hosći přišło. Na ležownosći Rakečanskeho hrodu je zdobom sakska rybarstwowa šula zaměstnjena a skići z hatami w bliskosći wuběrne móžnosće praksu hnydom na měst­nje dožiwić. Wjedro je plahowarjow ry­bow lětsa chětro poćežowało. Kaž Georg­ Stähler zdźěli, liča lětsa z 30 procentami mjenje wunoška žnjow rybow hač přerěznje. Tuž móhli lońše hubjene žně tónkróć samo stopnjować. Tež wuhlady do klětušeho su špatne, wšako njemó­žachu rybarjo haty a plahowanske připrawy wysokeje temperatury wody dla hišće wułójić. Dawno pak dyrbjała hižo­ nasada do wjetšich basenkow.

Anzeige