Pod nalětnim słóncom žiwjenje po dołhim zymskim času wotuća. To móžemy derje wokoło areala Erlichtec dwora w Rěčicach wobkedźbować. Móc słónca pak tuchwilu njedosaha, zo by so zdobom w jednotliwych twarjenjach sydlišća porjadnje něšto hibało. Kwakla koronawirusa tomu zadźěwa. Nětko w Sakskej hač do 9. meje podlěšeny lockdown staja sćerpnosć rjemjeslnicow a sobudźěłaćerkow turistiskeje informacije na dalšu krutu probu. Wot rjaneho wjedra w minjenych tydźenjach wobchodnicy ničo měli njejsu. Wulětnikarjo su drje swoje awta na parkowanišću wotstajeli, wuchodźujo so po bliskich hatach pak njejsu wulce na to dźiwali, hač tón abo tamny wobchod snano na kupcow čaka. Wo kulturnym poskitku w dźiwadłowej bróžni za čas pandemije rěčeć njetrjebamy, wona je zawrjena.
Budyšin (SN). Prawniscy poradźowarjo dźěłarnistwa twarstwo-agrar-wobswět (IG Bau) mějachu koronapandemije dla minjene lěto wjele dźěła. Cyłkownje 200 króć běchu woni w regionje zasadźeni. „Tak poradźowachu dźěłopřijimarjow w padźe krótkodźěła, pobrachowacych nahubnikow na dźěle abo ćežow w dohladowanju dźěći přistajenych dla“, rozłožuje nawoda wobwoda wuchodosakskeje IG Bau Peter Schubert.
Hladajo na wobmjezowanja pandemije dla su prawniscy poradźowarjo z potrjechenymi předewšěm telefonowali. „Wosebje wjele ćežow registrowachmy we wobłuku rjedźenja twarjenjow. Sobudźěłaćerjo skoržachu financielnych ćežow dla. Nimo toho wobkedźbowachu deficity w zwisku z dźěłowym škitom abo njepłaćeneje mzdy za čas karanteny“, Schubert rozprawja. W twarskej branši dźěše mjez druhim wo njepłaćenu koronapremiju a wo njepłaćene nadhodźiny. Twarscy dźěłaćerjo, lěsnicy abo rjedźerjo njemóža wot doma dźěłać, a hdyž su pěstowarnje a šule zawrjene, maja woni wulke ćeže, situaciju zmištrować. Dźěłarnistwo chce ludźom w časach krizy dale pomhać.
Zły Komorow/Rulec młyn (JoS/SN). Modularna rjedźernja wody (MWBA) při Rulec młynje blisko Noweho Města nad Sprjewju započnje po wuprajenju projektoweje nošerki a nadawkidawarki, Łužiskeje a srjedźoněmskeje towaršnosće hórnistwoweho zarjadnistwa (LMBV), w meji na probu dźěłać. Po słowach projektoweho managera LMBV Joachima Schmidta „su nimale wšitke dźěła dokónčene. Naš zaměr je, z připrawu znajmjeńša 90 procentow zerzawca ze stareho promjenja Sprjewje won dóstać.“ 1 800 metrow dołhe zanjerodźene promjo „brunu Sprjewju“ hłownje sobu zawinuje.
Rowno (SN/BŠe). Brunicowy koncern Łužiska energija a milinarnje (LEAG) je prěni raz hrozył, lěs blisko Wochožanskeje wuhloweje jamy wuswojić. Tuchwilu Choćebuska wobswětowa skupina Zeleneje ligi ležownosć wotnaja. Wobswětoškitne zjednoćenstwo pak njeda so zatrašić a chce ze swojimi aktiwitami we wohroženym lěsu pokročować. Swoju zwólniwosć, dale za přestrjeń wojować, su hakle wčera zaso wobkrućili a protestnu akciju přewjedli. Tak přihotowachu za nju dźesać metrow dołhi baner z napisom „Njepředajomny“. Renej Šuster z Choćebuskeje Zeleneje ligi potwjerdźi, zo nima LEAG hižo dosć argumentow za hórnistwowu potrjebu ležownosće. „Tuchwilu dźě ani jasne njeje, hač móže koncern rekultiwěrowanje zapłaćić“, Šuster wčera wuzběhny. „Chcemy swój lěs zachować, zo njeby brunicowa jama hač do Rownoho abo Mułkec sahała.“ Tež pohórnistwowy jězor njeby potom hižo tak wulki był a přichodne hrožace kóšty bychu so pomjeńšili.“
AquaTech Łužica chce Łužicu na pioněrski region nastupajo nowe surowizny z wody wuwiwać.
Njebjelčicy/Drježdźany (SN). Nimale 50 zajimcow je so minjeny štwórtk na prěnim sympoziju inowaciskeho zwjazka AquaTech Łužica wobdźěliło, informuje zwjazk. Zastupnicy ze wšelakich wobłukow, kaž slědźenja, hospodarstwa a politiki, „diskutowachu nadrobnje wo zwoprawdźomnych, hospodarsce wužiwajomnych a inowatiwnych wobłukach zhromadneho skutkowanja za strukturnu změnu we Łužicy“, wuswětla poradźowar Njebjelčanskeje Greentec Consult tzwr Andreas Kretschmer w nowinskej zdźělence.
Zaměrowy zwjazk Łužiska jězorina Braniborska je njedawno sakskemu zaměrowemu zwjazkej wo swojich aktiwitach rozprawjał. Mjeztym hotuja so tam na lětušu sezonu, při čimž maja so hišće mnohe twarske naprawy zakónčić.
Wojerecy (AK/SN). Zaměrowy zwjazk Łužiska jězorina Braniborska rozestaja so intensiwnje z wuměnjenjemi a sćěhami pandemije. „Dotal krizu derje zmištrujemy, čehoždla smy optimistiscy. Nadźijamy so nětko na start lětušeje sezony w meji“, wujasni nawoda zaměroweho zwjazka Detlev Wurzler na njedawnym posedźenju we Wojerecach, hdźež bě so susodny sakski zwjazk zešoł. Loni su w braniborskim dźělu jězoriny 7,1 procent mjenje hosći witali hač lěto do toho. Ličba přenocowanjow pak je so jenož snadnje wo 0,54 procenty znižiła. Hladajo na ličbu hosći campingownišćow su mějićeljo loni jasnje wjace ludźi zwěsćili. Mjenje hosći pak je so za dowol w bydlenjach abo hotelach rozsudźiło.
Budyšin (SN/BŠe). Po šěsć lětach skutkowanja jako prěni społnomócnjeny dźěłarnistwa IG Metall na wuchodźe Sakskeje Jan Otto swoje zastojnistwo złožił. Hižo wot lońšeho septembra nawjeduje wón stejnišćo w Berlinje. Po dotalnym planowanju ma zhromadźizna delegowanych kónc meje wo naslědnistwje rozsudźić. Na posedźenju nawodnistwa wuchodosakskeho stejnišća bu nětko Uwe Garbe namjetowany. Wón ma hižo tójšto nazhonjenjow. Tak je mjez druhim w zawodnej radźe skutkował. Wot lěta 2013 dźěłaše w regionje jako dźěłarnistwowy sekretar a je so mjez druhim wo to prócował, zawodne rady w twornjach załožić. Zdobom pak je so Garbe tež hižo na tarifowych jednanjach wobdźělił. „Na wuchodźe Sakskeje mamy hišće tójšto předwidźane“, wón wuzběhny. „Předewšěm sadźamy na wobstajnu produkciju abo decentralne energijowe zastaranje. IG Metall je na přichod wusměrjene a chce swoju rolu zamołwiće wukonjeć. Wobchodne stejnišćo dźěłarnistwa je w regionje jara derje nastajene.
Choćebuz (SN/JaW). Łužiska energija a milinarnje (LEAG) swoje wusměrjenje na digitalnje nastajeneho zastaraćela miliny pokročuje. Koncern to tež ze změnu w předsydstwje potwjerdźa. Kaž LEAG w nowinskej zdźělence informuje, je předsydstwowa rada LEAG kónc minjeneho měsaca „přiměrjenju wobłukow z přichodnje štyrjomi čłonami předsydstwoweje rady přihłosowała a noweju čłonow do rady powołała“. Tak přihotuja generacisku změnu w předsydstwje, kotraž ma w přichodnymaj lětomaj zwoprawdźena być.
Budyšin (SN/BŠe). Wjac hač połojca wšěch dowolowych jězbow ludźo dźensniši dźeń w interneće knihuja a trend dale a bóle přiběra. Tež koronapandemija je połoženje hišće přiwótřiła, wšako je wjele posłužbowych běrowow wobmjezowanjow dla zawrjenych. Marketingowa towaršnosć Hornja Łužica-Delnja Šleska (MGO) je sej nětko předewzała, mějićelow dowolowych domow a bydlenjow w kónčinje podpěrać. Konkretnje dźe wo to, přenajerjam pomhać, tak zo so jich přenocowanske móžnosće přichodnje jara derje wućeža. Zhromadnje z turistiskimi zjednoćenstwami Zapadna Łužica, Hornjołužiske horiny, Hornjołužiska hola a haty, městom Budyšinom a Nysowym krajom chce MGO informaciske zarjadowanja přewjesć. W zhromadnym dźěle z onlineowym knihowanskim serwisom změja zajimcy přichodnu póndźelu a wutoru składnosć, so dale kubłać. Za wotpowědny poskitk měli so wobdźělnicy do toho z mejlku přizjewić.