FSV Budissa Budyšin
– SV Babelsberg 03 2:2 (0:0)
Zestawa domjacych: Schulz – Kunze, Patka, Weiß, Merkel (67. Treu), Schlicht, Kral, Bär (67. Ciapa), Schmidt, Mack, Bönisch (57. Kašiar)
Při rjanym wjedrje pohosći regionalny koparski ligist Budissa Budyšin na domjacej Młynkec łuce šesteho tabulki ST Babelsberg 03 w prěnjej domjacej dypkowej hrě noweho lěta.
Domjacy započachu jara koncentrowani a nadźěłachu sej někotre móžnosće. Jako bu Tony Schmidt w přećiwniskej šěsnatce hrubje foulowany, dósta Fabrice Montcheu čerwjenu kartu (14.). Tak hraješe Babelsberg hižo zahe z mužom mjenje. Numerisku lěpšinu chcyše a dyrbješe Budissa wězo wužić. Wšitko tež derje wupadaše, wužiwanje šansow pak bě špatne. Najlěpšu móžnosć, wrota docpěć, měješe za hosćićela w prěnim połčasu Kevin Bönisch. Ale hač do přestawki wosta při 0:0.