ST Porchow – Sokoł Ralbicy/Hórki 2:7 (0:4)

Za Ralbicy zasadźeni: Schöne, Žur – P. Šołta, B. Heidorn, Wałda, L. Heidorn, Gloxyn, Rachela, A. Woko, N. Šnajder, Hicka, Matka, Čórlich, Mjechela, J. Šołta

Po wuspěšnej přihotowanskej hrě přećiwo Niskej hrajachu Sokoljo dźeń pozdźišo přećiwo Porchowej. Porchowčenjo hraja klasu niže we wokrjesnej lize. Dešća dla pak njemóžeše so hra kaž předwidźane w Porchowje wotměć, ale přesuny so do Małeho Wosyka.

Na wuskim hrajnišću Sokoljo z prawym zapalom startowachu. Hižo w druhej mjeńšinje docpě Pawl Rachela prěnje wrota. W prěnim połčasu zapisachu so tež Tim Hicka, Niklas Šnajder a Leonhard Heidorn do lisćiny třělcow. Wrota padnychu dźak sylnym kombinacijam a jónu zmylka wrotarja dla. Porchowčenjo, za kotrychž běše to tohorunja druha hra kónca tydźenja, so jónu strašnje před wrotami jewjachu. Tola Willi Schöne nadběh z nohu wotwobara a tež druhi pospyt k wrotam njedowjedźe. Ze změrowacym předskokom dźěše do přestawki. Trenar Christoph Gloxyn na wjacorych pozicijach hrajerjow wuměni. Mjez druhim zaměni wrotarja Titusa Žura.