Trenar FC Energije Choćebuz Stefan
Krämer
Georg Zielonkowski w rozmołwje z trenarjom FC Energije Choćebuz
Kak je z Wašeho fachoweho wida přihot na nowu hrajnu dobu wotběžał? Měnju přihotowansku fazu z testowymi hrami.
S. Krämer: Mi je so hra přećiwo Viktoriji Berlin wot 30. minuty sem jara lubiła, dokelž smy po letargiji skónčnje wotućili. Njejsmy přećiwo regionalnemu ligistej ani jednu wrotowu móžnosć dopušćili. To njeje samozrozumliwe a dyrbjało tež w přichodźe tak być. Šansy pak dyrbjeli so lěpje wužiwać. Tam mamy na kóždy pad hišće rezerwy. W testowych hrach smy drje 50 razow trjechili, ale zdźěla přećiwo nišoklasowym přećiwnikam. To njesměmy nadhódnoćić. Naposledk smy 2:6 přećiwo načolnemu mustwu z Čěskeje, Sparće z Prahi, wobstali. Někotre přećiwniske wrota su mje chětro mjerzali. Jim bychmy zadźěwać móhli. Na tamnej stronje je nam sylny přećiwnik naše słabosće pokazał.
Mustwo ma po prominentnych wotchadach někotrych nowych koparjow. Su woni wočakowanja hižo spjelnili?