SC Großröhrsdorf II
– SJ Njebjelčicy 3:0 (2:0)
Zestawa hosći: Hahn – Kral, Deleńk, Pawlik, Šołta, Mjechela, Haška, Hanuza, Lejnart, Hrjehor (55. Schütz), Čornak
Znowa bě trenarska dwójka koparjow Njebjelčanskeje SJ Handrij Krawčik/ Detlef Panic nućena mustwowu zestawu přerjadować. Z wjacorych přičin pobrachowachu hnydom štyrjo stajni hrajerjo. Nimo toho wotmě so partija na kumštnym trawniku, na kotrymž mějachu domjacy wězo lěpšiny. Bul běži na tajkich kopanišćach bjez zadźěwkow spěšnišo a přihrawki dyrbja precizne być. Z tym pak su sej hrajerjo wokoło zastupowaceho kapitana Roberta Lejnarta ćežko činili. Wulke šansy sej tuž žane njewuhrachu. Za domjacych pak zwjertny so wysoki bul, kotryž bu hišće wot sylneho wětřika podpěrany, w 40. min. do hornjeho kuta k 1:0. Prjedy hač so Njebjelčenjo tak prawje zhrabachu, ležeše přesłabje wotwobarany bul pjeć mjeńšin pozdźišo znowa w saku Nica Hahnoweje klětki. To bě wězo dospołnje kontraproduktiwne.