Cardiff (SN/MiR). Kubłansku jězbu do Waliziskeje je dźesać Serbow k tomu wužiło, so wo spěchowanju walizišćiny informować. Organizowała je zajězd městopředsydka Domowiny Judith Wałdźic. „Najzajimawše běše wustupowanje Walizičanow a kak woni projekty a iniciatiwy přesadźa a z kotrym pozitiwnym nastajenjom. Zahoriło je mje jich nastajenje, přiwšěm woměrje postupować a njedźěłać po principje, zo dyrbi wšitko być w krótkim času zwoprawdźene“, wona rozłoži. Wědomostna sobudźěłaćerka Rěčneho centruma WITAJ dr. Madlena Norbergowa zwěsći: „We Waliziskej měrja so wšitcy zhromadnje na jedyn zaměr. A tón je nałožowanje walizišćiny. K tomu tworja so wšelake rěčne rumy, tuchwilu wosebje za młodostnych. Wažne je jim wšudźe a z kóždym, kiž walizisce móže, tak rěčeć.“ Direktor Załožby za serbski lud Jan Budar praji: „Wšitke naprawy, kotrež so tam k spěchowanju walizišćiny přewjeduja, so jara profesionelnje, wosebje z pomocu wědomostnikow přewodźuja. Wone so stajnje a zaso ewaluěruja. Wosebje překwapiło mje je, zo maja bohate marketingowe naprawy.