Starši namołwjeja k dalšemu protestej w Podstupimje
Žylow (SN/MiR). Delnjoserbja su kruteje wole, so planam braniborskeho ministerstwa za kubłanje, młodźinu a sport (MBJS), wučbu serbšćiny přikrótšić, wobarać. To je diskusijne koło pod hesłom „Što stej nam serbskosć a Witaj hódnej“ wčera w dźěćacym dnjowym přebywanišću „Mato Rizo“ w Žylowje wunjesło. Přeprosył bě nošer přebywanišća, Serbske šulske towarstwo.
Staršisku iniciatiwu wobaranja bě Kathleen Komolka iniciěrowała, skedźbnjejo na to, zo „so jako sćěh wobmjezowanja serbšćiny mnohe kulturne a rěčne poskitki na šulach a w towarstwach pozhubja.“ Tak běchu na zarjadowanje předewšěm starši přišli. Chcychu pisać list ministrej Günterej Baasce (SPD) a jasnje zwuraznić, što delnjoserbska rěč a kultura za swójby woznamjenjatej. Wčera zběrachu ideje, kotrež ma Kathleen Komolka do cyłka zjeć. Wona přitomnych namołwješe na přichodnym posedźenju kubłanskeho wuběrka 23. měrca w Podstupimje před krajnym sejmom protestować, hdźež chcedźa list Günterej Baasce přepodać.
