Fachowcy wo perspektiwach diskutowali

Budyšin (SN/MiR). Rěčne skupiny k wuwučowanja po koncepciji 2plus maja so přichodnje hinak zestajeć. Wolóžić ma so z tym organizacija wučby serbšćiny na potrjechenych kubłanišćach. Na to su so wčera koordinatorki na 2plus-šulach ze zastupjerjemi Sakskeho statneho ministerstwa za kultus, Sakskeho kubłanskeho instituta (SBI) a Serbskeho šulskeho towarstwa dojednali. Přičina změny je, zo „dotalne postupowanje, skupiny po swójbnym pochadźe šulerjow zestajeć, hižo aktualnym potrjebam njewotpowěduje“, zwěsći zamołwity za serbske naležnosće w regionalnym zarjedźe Sakskeje kubłanskeje agentury Budyšin (SBAB) Bosćij Handrik.